Labizjan

Elisabeth Fecunda a trese e bòter enorme akin a un di nos worshopnan.

“Esaki ta dos labizjan ku nos tabata usa pa warda awaseru tempu mi famia tabatin kunuku ainda. Nos tabata warda e labizjannan den e mangasina kaminda tabata skur. Labizjan pa warda awa mester ta transparente pa por mira si e awa ta limpi. Di otro banda, labizjan pa warda simia aden tabata wordu hasí skur pa evita ku e simianan ta muri.”

E palabra labizjan ta bin di e palabra Franses dame-jeanne, un bòter den forma di lágrima of ku garganta smal ku tabata ser usá pa warda líkido i simia. Te ku añanan 60 awa potabel ainda tabata responsabilidat di hopi kas i kunuku individual paso e sistema di awa no tabata yega den área di Bandabou.

Na mes momentu e gobièrnu kolonial tabata deskurashá fuertemente e uso di tankinan di awa den e kunuku lokal paso nan por a bira brote pa sanguranan ku ta traspasá keintura hel. E labizjan portátil i versatíl tabata kumbiní pa usa tur dia. Nan sais ta varia entre 1 pa 15 galòn.

“E tankinan por a bira brote pa sanguranan ku ta traspasá keintura hel.”