Madel Jim ta corda cu su tata tabata usa un abacus / telraam pa hasi calculacion den su negoshi. E telraam tabata riba e toonbank di Jim Bros caminda tabata us’e frecuentemente. E tata di Madel, Jim Shue, a yega Aruba bordo di bapor den 1935 y ela disidi pa keda y traha na e refineria di Lago cu tabatin mester di miles di trahador. E demanda pa trahador aki a resulta den un aumento dramatico di e poblacion di Aruba cu mas di cincuenta diferente nacionalidad durante e di dos kwartaal di siglonan binti. Hopi migrante Chines a casa cu mucha muhenan local y forma famianan cu awe ta forma un parti activo di e comunidad Arubiano. Den caso di Madel, ambos mayor tin un background di migrante, su mama tabata Colombiana di e region di Guajira y su tata tabata Chines. E background multicultural aki a dun’e algun balor i etica di trabou fuerte. E motto di su mayornan: “probecha di e dia” ta resona te dia di awe.

“No laga pa manan loke bo por hasi awe.”

E herment di conta ta ilustra e cultura avansa Chines sigun Madel, cu su enfasis riba tene kosnan simpel y practico. Aparte di su beyesa y practicalidad, tabata considera cu e telraam ta trese suerte tambe. Un tipo di efecto multipicado ta inherente den e obheto aki. Madel tin hasta un colgador di oro den forma di un telraam cu su cuentanan cu e ta balora masha. E tabata un regalo di su tata y e ta gusta bisti’e durante ocasion special.