100 opheto

Ku tempu vários memoria i eksperiensia ta keda mará na e ophetonan ku nos ta rondoná nos mes kuné. Asina e ophetonan ta surpasá nan funshon inisial. Nan ta apsorbé nan propio historia, nan propio narashon, konektá nos ku otro, ku un sierto lugá, ku tempunan ku a pasa. Di e forma aki, un simpel opheto por bira un relikia ku ta kontestá pregunta tokante nos origen i nos identidat.

Deskubri e 100 ophetonan

Workshopnan

Nos a kolektá e ophetonan aki invitando personanan pa asistí na un seri di seis workshop na Museo di Kòrsou den mart i april 2022. Durante e workshop, partisipantenan tabata kompartí nan ophetonan i e historia ku tin tras di e ophetonan aki. Loke a resaltá serka nos ta ku niun di e kombersashonnan no a kaba den diskushon òf desakuerdo tokante kiko tabata bèrdat of kua opinion tabatin mas balor. E kombersashonan tabata bai tokante bida di hendenan den pasado i presente. Kada un di e partisipantenan tabatin su propio bista partikular pero e tabata algu interesante i inspirativo, no algu problemátiko òf kontroversial.

Nos a hasi nos bèst pa presentá e ophetonan den e esfera aki. Nan no ta representá un berdat so ni nan no ta ekskluí diferente perspektiva. Nos ta konsiderá historia komo un fenomeno ku tin varios forma, un kombinashon di ritmo ku no mester wordu kontá pa un solo bos.

Sera konosí ku e ophetonan

Deskubri e 100 ophetonan

Un trabou kontinuo

Loke nos ke logra ku 100 Opheto ta un kombèrsashon animá tokante Kòrsou su historia pero for di un perspektiva ku ta kuminsá di abou bai ariba. Pa años a ignorá hopi di Kòrsou su historia dor di e desigualdat di poder òf rikesa. Maske ta mustra manera ku tempu ta kambiando, nos ta kere ku ainda tin hopi mas pa deskubrí den e pasado skondí.

Ta nos intenshon pa ekspandé e proyekto di 100 Opheto pafó di Kòrsou di manera ku por traha un fuente riku di historia i opheto riba un eskala karibense òf kisas te asta riba un eskala mundial. Si bo por konta nos historianan ku nos no a yega di tende ainda òf trese ophetonan partikular pa nos, òf si bo ta kere bo por añadí algu na un di nos futuro proyektonan, por fabor tuma kontakto ku nos.

Fuentenan

E partisipantenan di e workshopnan tabata nos prinsipal fuentenan históriko. Si nos tabatin mester di mas informashon nos tabata puntranan pa konta nos mas tokante nan opheto ora e workshop a kaba. Den mayoria kaso nos a añadi konteksto pa pone kada opheto den un tempu i lugá.
Pa esaki nos ta kontentu di por a konta ku institushonnan manera NAAM i Archivo Nashonal di Kòrsou. Nan ta pone hopi informashon konfiabel na alkanse di públiko. Nos a hasi uso di bukinan spesifiko manera e tremendo buki titulá “De vergeten monumenten van Curaçao” (Arnhem, 2014) di Ruben La Cruz i Karolien Helweg ku ta papia tokante “e kas di palu furá ku bleki” i hopi otro publikashon balioso tokante e partinan menos konosí di Kòrsou su historia.