Loke a kuminsá un dia manera un karnaval karibense a transformá atrabes di añanan den un variante kurasoleño úniko di e fiesta mundial aki. Calviany ta konta nos e historia di su tata ku a tuma e inisiativa pa toka tumba i otro muzik di Kòrsou. Esei a sosode ku hopi trabou.

“Den añanan 70 musika di e islanan habla ingles den karibe (manera calypso i soca) tabata esnan mas skuchá durante e temporada di karnaval. Mi tata a haña un grupo di músiko pa forma un grupo di karnaval. E plan tabata pa toka tumba original. Tur kos tabata kla pa e gran parada. Desafortunadamente, mi tata a hañ’é den un pleitu grandi ku e otro miembronan di grupo. Tres siman prome ku e parada ela disidí di kansela tur aktividat ku tabata planiá.”

Un di e promé selebrashonnan di karnaval na Kòrsou a keda organisá na 1901 dor di un grupo di venezolano ku tabata biba temporalmente riba e isla. Tabatin un parada anto atardi un baile maskará na kas di e komersiante Figueredo. Te ku añanan 50 selebrashonnan di karnaval tabata pa e gremio haltu di sosiedat. Tabatin tiki partisipashon lokal.

Na 1971 e Komité Karnaval Kòrsou a ser fundá pa garantisá partisipashon di hende di tur nashonalidat, profeshon of fishi den e selebrashon di karnaval. E aña ei e lema tabata ‘Karnaval pa un i tur i pa uni tur’. A introdusí muzik di tumba pa marcha ariba.