Pòpchi globo

Clarina a trese un di e ophetonan di mas frágil na e workshop.

“Mi ta kere e ta parti di e tradishon hudiu. Asina leu ku mi por korda hudiunan tabatin e pòpchinan aki. Mi tabata duna lès di obra di man den añanan 90. Mi studiante tabata un señora di 80 aña ku tabata biba su so. Mi tabata bai busk’é na Monteberde anto kana bai e skol kaminda mi tabata duna mi lèsnan. Su wowonan tabata bon bon ainda.”

“Segun tempu tabata pasa mi tabata yuda e señora aki ku varios kos manera bai dòkter kun’é, paga su resibu di koriente, bai supermarket etc. E señora aki tabata usa e konosementu ku ela haña den su lèsnan di obra di man pa traha i bende arte. E tabata kana den bario i bende su produktonan. Ku e sèn ku el a gana el a laga traha un pòrch dilanti di su kas.”

“E tabata semper hopi agradesido na mi anto no solamente pa e yudansa ku e tareanan diario. E tabata ke pagami bèk pa tur loke mi tabata hasi p’e. E ora ei el a dunami e pòpchi aki. Su mama a hañ’é di regalo serka un famia hudiu ku e tabata traha p’é. E señora no tabatin yu.”

“Su wowonan tabata bon bon ainda.”