Tata di Imelda Kroon, Jose M.P. Kroon, a bisti e sombré haltu aki durante apertura di e promé aña di Staten di e teritorio di Kòrsou na 1937. Staten tabata e susesor di e Parlamento Kolonial di e kolonia hulandes Kòrsou. Sra. Kroon (1926) ta konta nos: “Mi tata a kumpra e sombré aki originalmente pa usa dia el a kasa pero despues e tabata bisti’é pa okashonnan spesial manera seremonianan politiko.” Jose Kroon tabata e dirigente di e Sindikato di Komersio i miembro di Staten. Su ruman hòmber, Ciro Kroon tabata Promé Minister di Antias Hulandes di 1968 pa 1969.

E sombré aki, ku aworaki tin mas di 100 aña, ta un Borsalino outéntiko; trahá pa e fabrikante di sombré di luho italiano di mas bieu na e pais. E sombré di felpa pretu fini ta furá ku 100% seda i e tin un stèmpel spesial na e parti paden ku e teksto ‘Almacen del Zulia Curacao’.