E kuchú akí ta mustra kon interkonektá Kòrsou semper tabata ku restu di mundu.

“Mi mama a dunami e kuchú aki promé ku el a bai sosegá 50 aña pasá. For di e dia ei apénas mi a us’é. Mi no ta kome karni hopi mas. Ademas, bo mester kombin’é ku otro bestèk pero hopi biaha e no ta echt kombiná pa motibu di su diseño pekuliar.”

“E kuchú skèrpi aki ku man a wòrdu trahá na Alemania anto e ta forma parti di un sèt di seis. Mi mama tabata trata su kuchúnan manera relikia antiguo. Nos, su yunan, no tabata mag mishi ku nan. Uniko eksepshon tabata ora tabatin un enkuentro sosial. E tabata usa e kuchúnan na hopi komementu ku el a organisá, espesialmente ora e prepará lomitu.”

“E lomitu ku nos tabata kome tabata bin for di Merka òf otro paisnan paso nos no tabatin hopi baka na Kòrsou. Un biaha nos a kome un lomitu ku tabata mustra un tiki diferente. Mi mama a bisami ku e tabata lomitu di turtuga di Kòrsou. E tabata hopi dushi! Awendia bo no por pensa mes pa kome karni di turtuga paso e ta un espesie protehá.”