Elisabeth a trese e wil aki na un workshop. “Den pasado krènwa tabata plat anto nan wilnan tabata trahá di heru. Tabata usanan riba plantashon pa transportá palu pa traha karbon pa kushiná kun’é. Den nos famia nos tabatin mester di palu pa keinta e fòrnu di mi tata su panaderia. Tambe nos tabata transportá yerba pa duna kabritu kome for di den mondi den krènwa.”

For di nan yegada na 1634, e kolonisadornan hulandes tabatin un impakto grandi riba e paisaje i naturalesa di Kòrsou. E repartishon di e isla den plantashon, mina i despues e refineria tabata e motibunan pa destrukshon di mondi pa krea kunuku, kap palunan manera wayaká, kapòk, brasia (ku tabata ser prosesá na Amsterdam pa haña tinzja kòrá) i mangrove. E salgamentu i polushon di posnan di awa, e gran kantidat di bestianan no-nativo manera kabritu i karné a kaba ku e lag mas abou di vegetashon ku tabata hasi e regenerashon di palunan ku a kap kasi imposibel. Kima palu pa traha karbon tambe tabatin un efekto hopi negativo riba e vegetashon.