Jerrycan di kerozin

E mama di Ilona tabata kumpra kerozin ku e jerrycan di heru aki. E tabata un trabou pisá. Ilona: “Mi mama tabata kòrtiku i flaku, e no por a karga 5 liter dus nan tabata yena e jerrycan na mitar.”

For di promé ku kompania di petroli Shell a establesé na Kòrsou, e habitantenan di e isla tabata importá petroli I kerozin. Esaki tabata sosodé den kanika di kerozin firkant. Awendia, tipo di kanika firkant asina ta wordu usá pa zeta di kushiná i pa zeta ku ta pone riba salada. Yu di Kòrsou a kustumbrá ku improvisashon. Hopi biaha nan tabata traha nan kasnan di e palu di e kratnan i kahanan ku tabata ser usá pa manda kaha for di Oropa pa Karibe. E blekinan di kerozin tambe tabata haña un di dos propósito. Hendenan tabata kubri nan kasnan di palu ku nan. E palu tabata dura mas largu asina.

E kantidat grandi di bleki di kerozin bashí asta a krea un fishi nobo. E blekero, e tabata usa e bleki di e kerozin pa traha tur sorto di artikulo pa kas. For di èmber te sèt kompleto di kuchú ku fòrki. I kisas e jerrycan di Ilona su mama (nos no sa sigur).

“Yu di Kòrsou a kustumbrá ku improvisashon.”