Loke realmente a impaktá nos durante e workshopnan di 100 Opheto ta e forma kon hendenan tabata bezig kaba ta transmití historia na e futuro generashon. Partisipante Arjen a asta kuminsá su mes museo, dependiendo solamente riba su mes forsa, ku yudansa di amigo i famia.

“Mi a kuminsá Museo Labizjan un par di aña pasá na tera kòrá, den un kas di kunuku renobá nèt banda di mi mes kas. Mi a kolekshoná un par di opheto históriko anto mi kier a laga públiko mira nan. Amigu i konosí a tende di mi projekto nobo anto nan a kore dunami of bendemi nan mes ophetonan. Ami ta interesá pa mayoria parti den ophetonan ku ta relatá na bida diario: kosnan ku hende ta usa paden i rònt di kas.”

“Mi a haña e pungu aki di un amigu ku tambe ta biba na bandabou. Hopi hende na Kòrsou no konosé e palabra Pungu. Probablemente e ta hopi bieu, pa ami e ta zona hopi afrikano. Den papiamentu moderno nos ta yama e opheto aki un flambeu. A traha e pungu dor di kue un pipa di metal largu, hasi un di e puntanan plat anto pone un den kada skina di kurá pa protekshon. Nan tabata wòrdu usá te ora elektrisidat a bira komun den siglo 20.”

“Hendenan ku ta interesá por bishitá mi museo durante siman. Mi mes hopi biaha no tei. Mi ta paipfeter anto durante ora di trabou hopi biaha mi ta traha na bandariba. Nos no ta kobra bishitantenan pero nan por laga un donashon si nan ta deseá. Nos ta usa e sèn pa drecha e museo i kumpra mas opheto.”