Moneda di ántes

Elisabeth Fecunda ta konta nos di su fasinashon ku moneda. “Mi ta kolekshoná moneda, meskos ku mi tata. Un di esakinan ta di 1923! Hopi di nos monedanan tin nòmber di kariño. Ta yama 1/10 florin depchi, 2 ½ sèn ta plaka i 2,50 florin yama fuerte.”

E promé monedanan ku a drùk spesial pa Kòrsou ta data di 1821. Promé ku esei tabata usa monedanan kolonial spañó i portugues mayoria biaha pa komèrsio internashonal i transakshonnan grandi. Monedanan hulandes a bira forma di pago legal riba e isla na 1826. E atministrashon finansiero di kolonia Kòrsou tabata hopi kaótiko. Konstantemente tabatin skarsedat di plaka chikí i tabatin un oumento di moneda estranhero pa kambia. Na fin di siglo 19 tres kompania privá a hasta kuminsá drùk nan mes monedanan.

Dos moneda spesial a ser introdusí na Kòrsou den komienso di siglo 20: un 1/4 I un 1/10 florin. Te na fin di segunda guera mundial a introdusí un sistema monetario separá pa Kòrsou. E diseño i material di e monedanan a kambia den añanan 60. For di e momentu ei moneda di plata tabata trahá di nikel i moneda di bròns a bira aluminio.

“Konstantemente tabatin skarsedat di plaka chikí.”