“Mi a heredá e tayónan aki di mi mama ku a bai deskansá 50 aña pasá na edat di 62 aña. El a hañanan dia el a kasa pues nan ta kasi 100 aña bieu. Mi ta usanan hopi pasó mi mes gusta traha bolo. Mi faboritonan ta bolo di kashipete, bolo di preimu, bolo pretu i bolo di dader.”

Yu di Kòrsou gusta bolo. Nos tradishon di kantika ku ta kanta ora di kumpleaños ta reflehá esaki perfektamente. Kaminda mayoria pais su kantika di kumpleaños ta pa òf tokante e persona ku a hasi aña (por ehèmpel ‘happy birthday to you’), na Kòrsou nos ta kanta ‘salú ku bolo nos ke’ ku un énfasis riba e parti di ‘bolo’. Kanta i kome bolo ta e ùltimo kos ku bo ta hasi na un hasimentu di aña. Despues di esei, kasi tur hende ta bai kas mesora.