Spaik di atletismo

Carlos Eleonora ta konta nos di su legendario spaiknan di atletismo.

“Mi tabata un deportista talentoso den añanan 70. Mi tabata sobresalí den futbòl, beisbòl i atletismo. Na edat di 17 aña mi a disidí pa spesialisá den atletismo. Mi a kore 100 meter kontra hendenan manera Bob Esprit. Mi a gana tur hende ku e spaiknan aki na mi pia. Mi a terminá den 10.7 sekonde.”

“Na edat di 18 aña mi a kore un kareda di selekshon pa disidí ken ta e koredónan mas lihé ku lo a bai Sürnam pa un kompetensia internashonal. 80 meter den e kareda mi tabata hopi mas dilanti ku tur hende. Despues mi a kai, sker pees den mi pia i mi no por a kaba e kareda. A hibami hospital. E representantenan di e federashon di atletismo a bisami ku si e kos aki pasa trobe lo mester operami. Mi a rabia i skohe pa stòp ku atletismo. Mi a warda mi spaiknan den un kashi na kas pa mustra mi futuro yunan i nietunan. Nunka mas mi a tende algu di e federashon di atletismo. Kisas mi tabata un kompetensia muchu fuerte pa tur e nòmbernan grandi.”

Den e lastu dekadanan Kòrsou a produsí un kantidat di koredó ekselente, e loke ta hasi e kos mas interesante ta ku tur ta maskulino. E veterano mas konosí ta Churandy Martina. E tin mas tantu rekòr di atletismo na Hulanda i e antiguo Antia Hulandes. E team di relevo hulandes ku a gana un medaya di plata durante Weganan Olímpiko di 2020 den 4×400 meter tabatin dos miembro ku a nase i krese na Kòrsou (Terrence Agard i Liemarvin Bonevacia) i un miembro ku mayornan kurasoleño (Ramsey Angela).

“80 meter den e kareda mi tabata hopi mas dilanti ku tur hende.”