Spiritualidat Afrikano tabata imprimí den bida diario te e promé mitar di siglonan 20. Pues nos tabata kontentu ku Calviany a partisipá den e workshopnan. Ainda e ta praktiká ritonan spiritual ku raisnan Afrikano.

“Mi mes a traha e opheto aki. Nos ta usa e kapa di koko den ritonan pa protekshon i sanashon. Nos ta usa solamente materianan natural den ritonan, tur kos mester ta trahá di palu, koko, klei, kosnan ku ta bin di tera.”

Tabata konsiderá normal pa mira spiritu i mayoria hende tabata konosé mata i yerbanan medisinal ku tabata kura doló di kabes, barika i otro malesanan. Ku pasashi di añanan e práktikanan aki tabata wordu yamá ‘brua’ ku un tono di menospresio. E ta derivá di e palabra spaño ‘bruja’ ku ta nifiká hèks.

Aparte di brua tin montamentu, un religion legítimo ku kolonistanan hulandes a oprimí for di siglo 18. E esensia di montamentu ta pa haña balanse den bida pa medio di e relashon ku antepasadonan i nan energia. E religion tin ritonan establesé, inisiasion i spesialista. E tin hopi influensia di Congo i un tiki di Yoruba. Esnan ku ta krese den montamentu por bai Cuba, Haiti of Nigeria pa inisía i risibí training. Mayoria produkto manera zeta, awa i e klei blanku ritualístiko yamá Pemba ku mester usa den seremonianan ta bin di eksterior. Algun otro opheto, manera e kapa di koko aki, ta trahá lokalmente. E ritonan di montamentu ta sosodé te dia di awe pero kasi semper e ta sosodé na kas. Despues di tres siglo di ta suprimí, ainda e ta skondí.