Lusette Verboom ta konta nos tokante seter, un sistema di spar pa entiero den forma di koperativa. “Mi mama a habri un kuenta di seter pa mi i mi seis rumannan asina nos a nase. Esey ta nifiká ku kada un di nos tabatin su mes buki di seter, meskos ku mi mayornan. Mi tata i mama tabata miembro di e seter di Montaña.”

“Un biaha pa luna e miembronan ta reuní na e kas di seter pa papia riba loke mester sosodé ku nan plaka di spar pa garantisá ku e ta duna un rente rasonabel. E ora ey ta usa e rente riba e plaka di spar pa kubri algun di e gastunan di entiero di miembronan. Obviamente e sistema mester ta rendabel pa e por funshoná!”

“Un par di mi rumannan no ta usa nan bukinan di seter mas. Nan plaka di spar ta pertenesé na e organisashon awor. Mi mama i tata a fayesé ku 88 i 91 aña. Nan tur dos a spar hopi. Nos a risibí 3000 florin pa tur dos anto a usa e sèn pa paga parti di e kahanan di morto.”

Kòrsou tin un historia largu di koperativa. E proménan tabata fabrikanan chikitu na komienso di siglo 20. Na 2018, un for di kada 5 hende tabata miembro di un of mas koperativa, mayoria bes credit union.