“Ora mi a haña e pòchinan di krema aki na kosta mi a kòrda mesora riba mi mama. Esnan blanku ta Pond’s Cold Cream, un krema pa kara masha popular den añanan 60. Mi mama semper tabatin un par di pòchi riba su tualèt den kamber. E tempu aya mayoria hende muhé tabatin un tualèt, mayoria biaha un antik, ku un spil grandi pará riba dje. Kada dos luna mi mama tabata bisami pa limpia e tualèt i e pòchinan riba dje pa kita tur sushi i stòf. Despues ku a stòp di importá Ponds otro kremanan di kara manera Nivea a bira popular.”

Komo hende, nos genétika i kueru tin mas similitut ku diferensia. Sin embargo, tin algun problema di kueru ku ta impaktá esnan ku tin un kueru riku na melanina mas tantu ku otronan. Problemanan ta enserá kueru seku òf un tono di kueru desigual. Pa mayoria dama kurasoleño, limpia i mantené e kueru húmedo ta un rutina diario.