Bonchi djuku

E bonchinan chikitu aki kasi parse joya presioso. Nan a hasi un biaha remarkabel for di selva di Amazonia pa kosta di Kòrsou. Natasha Cabenda tabata kolekshoná nan un tempu. E ta splika nos ki sorto di bonchi nos ta mira aki.

“Nan sa yamanan e simianan ku ta drif. Nan ta bin for di profundidat di e selva di Amazona kaminda nan a kai den un riu anto laba bai laman. Nan ta keda intakto anto ta bai den tur direkshon ku e koriente. Semper hende a asosiánan ku suerte paso nan ta bin di leu. Nan a kuminsa traha prenda ku e bonchinan. Nan ta yama esun grandi Sea Heart.”

Tin hende ta bisa ku bonchi djuku ta trese suerte den weg’i plaka. Pero e bonchinan briyante tin otro nifikashon pa Natasha. “Mi ta kana ku bonchi djuku pa suerte. Hopi biaha mi ta kana rònt ku tres bonchi djuku: un pretu i dos ku rant kòrá. Ora mi bai un kaminda ku influensia negativo mi ta saka e bonchi djuku for di mi tas anto tene nan den mi saku di karson pa nan ta serka di mi.”

Na e workshopnan nos a mira mas ehèmpel di ophetonan bieu i spiritual ku a haña un interpretashon mas modèrno i personal. Den e sentido ei nan ta hunga un ròl den bida diario te dia di awe. Meskos ku e bonchi djuki di Natasha.

“Semper hende a asosiánan ku suerte.”