Trahando riba e proyekto aki regularmente nos tabata interkambiá tokante e karkónan aki. Nan ta opheto òf no? Bo por hañanan den hopi sala i balkon na Kòrsou. Tambe ta usanan komo instrumento musikal. Pero di otro banda nan ta keda parti di naturalesa. Kiko abo ta pensa?

Partisipante Natasha no tin duda.

“Na 2003 mi a kuminsá ku mi hòbi di kolekshoná opheto, mi a kuminsá ku karkó. Mi a ripará ku no tabatin mesun tantu karkó manera tabatin promé ku mi a bai biba Hulanda. Mi no tabata mira esunnan yen di koló mas. Mi a pensa ku e karkonan a bira skars pa motibu di polushon na e parti wèst di e isla. Den komienso semper mi tabata haña e mesun tiponan manera kiwa. Despues mi a realisá ku sierto playanan tin nan mes tipo di karkó. Ta manera kos ku laman ta skupi nan afó pa hende hañanan.”

“Un dado momento mi a haña un karkó grandi ku no tabata di blek: un tesoro. Mi a haña sa ku karkó tin 4 ruman hòmber chikí. Mi a mira e promé den kurá di e famoso artista Yubi Kirindongo. Mi a fia su karkoó, buska un otro durante un aña largu te ora mi a logra hañ’é di manera ku mi por a dun’é su propiedat bèk. Despues mi a bin haña sa ku e otro tresnan ta hopi skars. El a tumami shete aña na tur pa kompletá mi kolekshon di karkó. “