Bòter i kanika di bleki

Un di nos partisipantenan a trese e kanika di bleki i un bòter di awa na un workshop. Entre 1861 i komienso di siglo 20, tabata transportá kerosin pa Kòrsou den kanika di kuater galòn. Despues di e yegada di tankeronan di petroli, ainda e kanikanan di bleki tabata yega Kòrsou na gran kantidat komo empake di zeta pa kushiná kuné di markanan manera Tralala i Argo. Riba e isla e kanikanan a sirbi un otro propósito komo protekshon eksterno pa kasnan di palu i komo kanika pa warda awa aden. Ademas, un profeshon nobo a lanta: e blekero.

Te ku fin di siglo 20 tabatin hopi blekero i artistanan ku ta traha ku bleki na Kòrsou. Blekeronan tabata transformá e blekinan bieu den tur kos for di lampi te ku beker pa midi i forma di bolo. Pa hasi esaki nan tabata usa sòlderbout, skèr, hèrmèn di palu y patronchi di karton. Pasobra tin un kantidat grandi di merkansia barata importá trahá di plèstik, aluminio i serámika disponibel den e ultimo dékadanan no tin masha demanda pa e produktonan aki mas. E último blekero konosí di Kòrsou tabata Juan Boulio ‘Boy’ de Palm. Den aña 2010 e tabata organisá workshop pa siña hobennan su fishi.

“E último blekero konosí di Kòrsou tabata Juan Boulio ‘Boy’ de Palm.”