Nos partisipante Noris a konta nos di e opheto antik aki.

“E Hesus di Nasereno aki ta mas ku 150 aña bieu. Mi no ta sigur kon el a yega den nos famia pero mi sa ku mi a wak e hopi na mucha. Mi mama tabata un señora hopi religioso ku tabata kolektá sèn pa nos misa di bario. E tabata manda e yaya na e bisiñanan ku e Hesus di Nasareno aki pa pidinan depositá un parti di e sèn den e lachi anto pas’é pa nan bisiña ku lo hasi meskos, etcetera.”

“E tempu ei, na fin di añanan 40, e tabata algu normal pa hasi den Otrobanda paso nos tur tabata konosé otro i nos tabata hopi será. Despues di un ratu mi mama ta haña e Hesus bèk i e ta entregá tur e sèn na Misa di Santa Famia ku tabata banda di nos kas. E kos remarkabel di dje ta ku e ta sintá. Asina leu ku mi sa Venezuela ta e úniko lugá kaminda bo por topa Hesus sintá, tur otro kaminda nan ta drumí òf krusifiká.”