Nos partisipante Calviany Eleonora ta konta nos: “Mi a kumpra e tambú aki for di Òmpi Tio den felis memoria, un di e músikonan mas konosí na Kòrsou. E tabata duna lès di tambú (músika) na Kurá di Arte. Esaki ta e tambú ku Òmpi Tio tabata usa pa rito. E tabata bisa ku tin algu ku e tambú aki. Promé e tabata kompletamente blanku. Mi a pòlish e, limpi’é anto pint’é kòrá. E koló kòrá ta atraé energia festivo i alegre. Esaki ta e promé tambú ku mi a yega di kumpra. Promé mi tabata train ku hèmber ku bo ta usa tur dia.”

E palabra tambú ta referí na e instrumènt i e género di músika. Den siglonan 17 i 18 músika di tambú a originá na Kòrsou for di vários estilo musikal, baile i ritmo di Wèst-Afrika. Mayoria di e ekspreshonnan kultural aki a bin di Congo anto a yega Kòrsou ku e katibunan. Segun tempu a pasa, e meskla di influensia afrikano a kambia i adaptá na sirkumstansianan lokal. Sierto elementonan afrikano manera ripitishon, uso di varios ritmo i improvisashon a keda fasil pa rekonosé.

Pa hopi tempu a oprimí músika di tambú, asta e tabata prohibí den siglo 20. E menospresio di tambú tabata basá riba e idea rasista ku ekspreshonnan kultural afrikano tabata indesente i inferior na esnan di orígen europeo. Te ku aña 2012, enkuentronan di tambú tabata tin reglanan estrikto ku no tabata apliká pa otro géneronan musikal.