Wei

Den un di nos workshopnan nos a haña mas komprenshon di un nesesidat básiko manera bebementu di awa i e esfuero rekerí pa por koba pos den tera tur na piedra di Kòrsou,.

“Un wei ta un hèrmèn ku nos ta usa pa koba òf korta material duru kun’é manera muraya pa por pasa pipa. Den pasado nos tabata usa nan pa koba pos. Ora bo ta koba un pos bo por topa ku bloustenchi, un baranka hopi duru. Bo ta pone e wei bou òf riba e bloustenchi anto keint’é den kandela. Ora e wei ta kayente kayente e ta rementá e bloustenchi. E ora ei bo por sigi bo trabounan di kobamentu; bo tin ku koba règt bai abou pa bo no daña e struktura di e pos. Despues di trabou nos ta usa e wei pa hasi músika.”

Awa fresku ta vital den tur sosiedat. Kòrsou tin un klima semi-seku ku periodonan largu di sekura loke ta krea un skarsedat di awa fresku. Den siglo 20 e demanda pa awa fresku a krese dramátikamente ku e yegada di e refineria i e kresementu di e populashon ku esaki a trese kun’é. Segun e nivel di awa den tera a baha, e brote di awa a bira mas skars. E promé planta di purifikashon di awa a wòrdu traha na Kòrsou den 1928. Despues di esaki gobiernu a kuminsá distribuí awa via di pipa pa kasnan den stat. Den añanan 60 kasi tur kas riba e isla tabata konektá riba e ret di distribushon di awa.

 

“Periodonan largu di sekura ta krea un skarsedat di awa fresku.”