Manga di hak

Kèncho, partisipante na 100 Opheto ta splika nos ta ki opheto esaki ta. “E hak grandi aki ta un hèrmèn ku piskadónan tabata usa pa hinka piska grandi den nan botonan. Ta pasa e hak dor di e kai kai anto e ora ei ta hinkanan den e boto.”

E awanan rònt di Kòrsou ta bira hopi hundu for di ora bo ta un miya for di kosta. Durante di henter aña bo ta haña piská di laman hundu manera barakuda, balaú i buní. Tur ta piska ku hopi forsa ku bo no por hinka den boto kon ku ta. Peska na Kòrsou, histórikamente, tabata semper hopi importante pa e gruponan pober di e poblashon.

Despues ku a abolí sklabitut 1 di yüli 1863, peska tabata un di e poko formanan alternativo pa krea trabou. Apesar di esei mayoria hende ku tabata katibu a haña nan forsá di keda traha riba e plantashonnan, pero awor pa un rekompensa mínimo. Peska tambe tabata generá tiki. Bon mirá, e desigualdat ekonómiko grandi di despues di sklabitut a keda eksistí semper. Ku e yegada di e refineria na 1914 bienestar sigur a krese. Pero tabata esnan pudiente i e trahadónan estranhero ku a studia ku a benefisiá mas di esaki.

Te awe peska ta un forma di ingreso mínimo. Piskadónan lokal ta sinti e preshon di turismo i barkunan di peska grandi strañeru. Nan ta piska ainda den e forma tradishonal. No tin sèn pa invertí den barkunan moderno.

“Bo ta haña piská di laman hundu manera barakuda, balaú i buní.”