Wea di heru

Den e era desechabel di awendia, artíkulonan di kas no ta dura muchu. Ta difísil imaginá ku e wea aki ta mas ku un siglo bieu! “E wea aki tabata pertenesé na mi wela ku a nase na 1888. Mi wela i mama a nase na Boneiru i despues a bai biba den bario di Fleur de Marie aki na Kòrsou. Tempu mi tabatin 3 aña nos a muda pa bario di Kwartier. Mi wela a kushiná den e wea aki, mi mama tambe. Prinsipalmente funchi ku bonchi i sópi. Ki ora ku e funchi pega den wea nos tabata raspa e funchi, basha bonchi riba dje anto komé. Mi no ta hasi esei mas. Mi a warda e wea komo rekuerdo di mi mama.”

“Mi wela a kushiná den e wea aki, mi mama tambe.”