E wea di pishi aki tin un orea pa distingí’é for di e weanan pa kushiná aden. Esaki tin su motibu! Den añanan 50 mayoria kas na Kòrsou no tabatin un baño. Famia Martina di Fleur de Marie no tabata un eksepshon. “Mi mayornan tabata pone un wea di pishi bou di kama anochi. Si un hende mester a oriná, nan tabata oriná den e wea. Mainta mi mayornan tabata saka e wea i hasi’é bashí den un bleki grandi den e baño pafó. Tambe nos tabata basha orina riba nos matanan kontra pispis anto asta tabata hasi uso di dje ora un miembro di famia tabatin doló di orea. E tabata pas’é un bes!” No tabata por a bai af den e weanan di pishi ku tabata usa den kas; esei tabata sosodé den e baño pafó.’

Tur dia un persona ku tabata deshasí di sushi humano tabata pasa di kas pa kas i tabata puntra e famianan si nan tabatin mester di yudansa. Mardugá e tabata bin bèk na e kas di e famianan ku a bisa si, kue e bleki silensiosamente, poné riba su kabes, kana bai na kosta i benta e kontenido na laman. Mainta trempan e bleki tabata bèk na su lugá, limpi limpi. Mayoria hende ku tabata hasi e trabou ei tabata kobra dos florin pa bleki.