Elisabeth Fecunda gusta kolekshoná biyete. El a fia nos e biyetenan bieu aki di ANG. Elisabeth: “E biyete kòrá di un florin tabata yama sobrekama paso e tabata parse e sobrekamanan kòrá ku tabata popular den e tempunan ei. Riba e biyete di 2 ½ florin bo por mira un avion di ALM, e kompanía di aviashon antiano ku tabata eksistí te 2002. Riba e biyete di 5 florin tin un imagen di e trupial, un di nos paranan nashonal. Awendia nos tin solamente biyete di 10, 25, 50 i 100 florin.”

Pa tempu largu e florin hulandes tabata un forma legal di pago na Kòrsou . Na 1940, ora Alemania Nazi a okupá Hulanda, Antias Hulandes a haña su propio moneda, e florin Antiano. E moneda a wòrdu mará na e balor di e dòler merikano.