Faha di padvinderij

Vanessa Abad a bini un di e workshopnan ku e faha di padvinderij aki. Grabá den e kueru di e faha tabatin algu spesial.

“Den añanan 80 mi tabata den un grupo di skout yamá Trekvogels (Paranan Migrante). Nos tabata reuní tur djasabra den Emmastad. Aki mi a siña hasi varios kos, pero tambe moral i balornan ku mi ta apliká te dia di awe. E faha di padvinderij aki tabata di mi tanta grandi, Ester Alburg-Baal. El a nase 1 di aprel 1900 na Paramaribo, Sürnam. Ora su kasá, Marius Alburg, a haña trabou na Royal Shell nan a bin biba Kòrsou. Mi ta yam’é tanchi Stel. E tabata hopi sosial i di loke mi a tende aktivo tambe den bario di Suffisant. E tabata dirigente di un grupo di padvinderij ku mi no konosé. Dia tanchi Stel a tende ku mi tambe a diskubrí e kaminda di padvinderij el a bai buska su faha anto el a dunami’é! Loke ta hasi e faha mas spesial pa mi ta e echo ku su adrès a ser grabá den e faha. Años despues di risibí e faha nos a kumpra e kas di tanchi Stel loke ta nifiká ku mi adrès tambe ta grabá den e faha awor.”

Inisialmente padvinderij tabata forma parti di e esfuersonan kolonial di Hulanda pa ‘eduká’ kurasoleñonan sigun e norma i balornan oropeo. Misionarionan hulandes a dirigí padvinderij pa largu tempu. Segun tempu tabata pasa, kurasoleñonan a tuma mas i mas di e trabou over anto padvinderij su sistema a kambia.

“Nos tabata reuní tur djasabra den Emmastad.”