E toganan blanku di e Fraternan di Tilburg tabata un bista diario na Kòrsou. E religiosonan aki a establesé nan mes na Kòrsou na fin di siglo 19. Nan meta tabata pa siña i eduká e hubentut kurasoleño. Tur esaki basá riba e norma i balornan hulandes i katóliko. Esaki tabata sosodé entre otro na Sint Thomas College. E fraternan tabata duna lès einan, bistí den nan toga blanku.

E enseñansa tabata dirigí fuertemente riba Hulanda. Pa materianan manera geografia, biologia i historia e fraternan a desaroyá nan propio método. Kòrsou i e area karibense hopi biaha tabata sentral. Nos Tera tabata e método pa e materia Geografia.

Un di e partisipantenan na e workshop a trese e buki di tarea di Nos Tera, el a han’é serka un tio ku antes a haña les serka e fraternan.