Tin ora partisipantenan ta bin e workshopnan ku ophetonan di gran nifikashon personal pa nan pero ku no ta konta algu di e historia di Kòrsou direktamente. E oloshi solar aki ta un ehèmpel. Pero kiko a resultá? E opheto a krea kombèrsashonnan tokante kon ta eksperensiá tempu na Kòrsou.

Kaminda mas i mas e mundu digitalisá ta mará na tempu (ta parse ku tur kos mester sosodé mas lihé), na Kòrsou ta keda espasio pa un otro forma di tempu. E Griegonan di antigwedat ta yama e tempu ei Kairos. Lo bo por tradusi’é komo “e okashon korekto”. E momentunan den nos bida kaminda tur kos ta parse di ta drenta otro i bo ta lubidá tempu. Yunan di Kòrsou ta komprondé e kos ei hopi bon. Nan ta tuma nan tempu pa un enkuentro no planiá i por lo general no ta plania hopi kos riba nan dia di manera ku semper ta sobra tempu pa algu imprevisto.