Bèshi

Chila a splika nos pa kiko tabata usa e opheto aki. “Ántes aya no tabatin pòtmòni. Tur hende tabatin un bèshi. Bo tabata kumpra un solamente si bo mes no por a traha un. Den e kaso ei bo ta bai serka un persona spesialisá den flèktu bèshi, meskos ku e tempu ei tabatin hende ta flèktu sombré. E bèshinan tabata trahá di un tipo di kabana spesial. Ami tambe a siña flèktu mi mes bèshi.”

E bèshi aki ta forma parti di mas di 170 opheto ku partisipantenan a trese na e workshopnan. E workshopnan tabata na Museo di Kòrsou den Otrobanda. Pa yega na e selekshon final di 100 opheto nos a invitá e bishitantenan di e museo pa vota pa e ophetonan ku nan a gusta mas. Nos a saka potrèt di tur e ophetonan, drùk e potrètnan i ponenan na muraya di e museo akompañá pa un deskripshon kòrtiku. Tur hende por a vota pa tres opheto.

E bèshi tabata un di e ophetonan ku a risibí mas tantu voto. Kiko abo ta kere ta e motibu? Abo lo a vota pa e bèshi? Kiko ta bo tòp 3 personal? Laga nos sa!

“Bo tabata kumpra un solamente si bo mes no por a traha un.”