Chila su mama tabata usa e mulina di kushina aki pa traha tur sorto di kos dushi i pasapalu. “Mi mama a nase di mayornan boneriano pero el a krese na Venezuela. Ora el a bin Kòrsou ya kaba tabatin algun tradishon venezolano aki, manera kome ayaka den temporada di Pasku. Tur aña mi mama tabata mula maishi den e mulina di kushina pa traha e mansa pa ayaka. Awendia bo por kumpra hariña di funchi pa trahanan kun’é! Tambe e tabata mula pinda pa traha lèter anto bonchi wowo pretu pa traha kala.”

E lista di pasapalunan di Kòrsou kasi no tin fin anto e ta reflehá e herensia multikultural di e poblashon di e isla. Kala ta bolita di bonchi wowo pretu hasá. Nan a yega Kòrsou for di Nigeria kaminda nan ta konosí bou di e nòmber Akara. E forma S di e lèter di pinda a bin di Kòrsou mes. Un teoria popular ta bisa ku e lèter S ta para pa seú, e fiesta di kosecha.

E forma den kua e pasapalunan adoptá a keda kambiá atrabes di e añanan por konta nos algu tokante kon na smak e vershon original a kai. E krokèt hulandes a mantené su nòmber i forma pero su smak i struktura nobo a lag’é bira e krokèt di Kòrsou. E hallaca venezolano kasi no a kambia ku eksepshon di e preimunan i e forma di skibi e nòmber.