Vanessa Abad a haña e saku postal aki regalo serka un ex-kolega ku tabatin e saku den e bodega na kas pa hopi tempu. E opheto ta konta e historia di e ‘status aparte’ ku Aruba a optené na 1986 i ku a kambia e relashon entre Kòrsou i Aruba.

“Riba e saku postal aki bo por mira klaramente e seis streanan representando e islanan di e antiguo Antias Hulandes. Ora Aruba a optené su ‘status aparte’ na 1986, el a nifiká entre otro ku e bandera di Antias Hulandes mester a keda adaptá pa un ku sinku strea simbolisando Boneiru, Kòrsou, Saba, St. Eustatius i St. Maarten. Tur opheto ku seis strea mester a keda saká for di sirkulashon. Esaki tabata e kaso tambe pa e sakunan postal aki.”

“Dia Aruba a sali for di Antias Hulandes mi tabatin sinku aña, muchu yòn pa kompronde kiko esaki tabata nifiká. Mi ta korda e sintimentu ku mi tabatin. Mi a haña yamer… yammer ku a kita un strea. Yamer ku Aruba no tabata forma parti di ‘nos’ mas.”