Hendenan sklabisá di kunuku tabata usa e chapi aki pa koba kanal pa planta simia aden. Anochi nan tabata us’é manera un instrumento musikal. Kèncho ta konta nos ku e ta toka e chapi aki for di dia e tabata mucha den añanan 70.

“Mi a kere mi a pèrdè mi chapi. Ora mi a bin bèk for di Hulanda mi tata tabata renobando e kas anto e ora ei mi a han’é bek. Mi tata a bisami: ‘Ta bo chapi. Bo ta korda?’ Mi a bisa si! Mi a brasa mi chapi anto bai kas kun’é. Mi ta asina kontentu ku mi a haña mi instrumènt bieu bèk. Mi a ward’é te dia di awe. Mi a usa e chapi aki pa varios presentashon i workshop.”

“Mi tin sigur ku a us’é manera un hèrmèn di kunuku paso bo por mira e markanan riba e heru. Esei kièr men ku el a dal den piedra i baranka, den heru i den tur loke bo por haña bou di tera. Tempu mi tabata mucha mi grandinan a mustrami kon bo ta plug tera I kon bo ta kanta un ritmo tanten bo ta planta simia. Nos tabata koba e kanal, hala patras i kanta un kantika ‘ho dji ho dja ho sanakamina ko dja’, . Ora kanta ‘dja’ e chapinan ta drenta e tera huntu, tur hende ta hala patras.”

“E kantika ta un kombinashon di papiamentu i gueni. Ho dji ho dja ta gradisimentu na Dios. ho sanakamina ko dja: Mi ta riba e ruta di trabou.”