Premio Cola Debrot

Partisipante Christel Monsanto a nase na Alemania anto tin mas ku 50 aña bibá na Kòrsou. El a trese e opheto chikitu aki ku ta nifiká hopi p’é. “Esaki ta e premio Cola Debrot, un premio kultural ku ta wòrdu otorgá tur aña. Mi defuntu kasá Tony Monsanto a gana e premio na 2009. E tabata un arkitekto i artista visual.”

Tony Monsanto tabata un representante di artistanan visual kurasoleño ku a bai afó pa desaroyá nan fishi despues di 1960. E tabata hopi konosí den e mundu di arte karibense i latino amerikano. Monsanto tabata inkorporá referensianan na leyendanan karibense, tradishonnan afro-karibense i tabata atendé ku e kompleksidat di identidat den su trabou. Despues ku el a regresá Kòrsou na 1999 el a partisipá primordialmente na shownan di arte internashonal.

Monsanto a hunga un rol signifikante den e kreashon di mas visibilidat pa arte modernu di Kòrsou. Den e último dekadanan interes públiko den arte visual a krese enormemente. Artistanan Tirzo Martha i David Bade a lanta Instituto Buena Bista (IBB) den 2006, e ta un sentro pa arte kontemporaneo na Kòrsou situá riba tereno di un institushon mental. Nos propio Cleo de Brabander tabata un di e promé studiantenan pa gradua di IBB.

“E tabata hopi konosí den e mundu di arte karibense i latino amerikano.”