Calviany ta konta nos tokante e blachinan ku el a trese na un di nos workshopnan. “Nos ta usa e blachinan pa sensia. Promé ta tuma un taki, despues nos ta lora e blachinan rònt di dje anto nos ta kimanan den kas pa diferente motibu. Pa protekshon nos ta usa yerba di hole, sentebibu i blachi di laurel. Nos ta usa sage pa limpia kas energétikamente.”

“Mi a bai San Pedro na Bandabou anto riba kaminda pa kas mi a haña sage i sage blanku. Mi a plantanan den mi kurá. Awendia ta basta difísil pa hanja sage na e luganan ku ta bende sensia, tin skarsedat.”

Na Kòrsou, un kas limpi ta bai mas leu ku djis higiene. E ta sirbi tambe pa kita ‘fuku’, un tipo di mala suerte ku ta move dor di airu anto ku por drenta den hendenan su kas. Fuku por pega riba un hende sin un motibu partikular. E por ta tambe e resultado di un persona su mes akshonnan, pensamentunan i palabranan. Un otro hende tambe por mand’é. Pa kita fuku for di den un kas bo mester kima un material natural ku ta hole fuerte anto ku ta produsí hopi huma.