“E kachu di baka tabata wòrdu usá komo instrumento musikal pa pasa mensahenan manera anunsio di morto. Tabatin tokadó di kachu na diferente lugá pa por pasa e mensahenan lihé di un parti di e isla pa otro. E gobi ku ta kompan’é ta un kòpi chikí pa basha likor aden pa e tokadó di kachu.”

“Toka kachu ta algu hopi pisá, e ta rekerí un téknika similar na toka tròmpet. Pa traha un bo ta hinka un bara di heru chikí mas hundu posibel den e kachu. Kaminda e keda pegá bo ta koba un buraku pa supla. Esaki a wordu trahá pa Ciro Eleonora, mi tio grandi. E tabata un di e personanan ku a trese e tradishon di seú pa sentro di siudat den añanan 40 i 50, hasiendo e un parada.”

Un di e kosnan ku nos a tuma nota di dje durante e proyekto aki ta ku e traspaso di tradishon semper ta den man di e pueblo mes. Nan ta disidí kua elemento ta keda mantené, modifiká òf lagá den pasado. Seú a sali for di kunuku bai stat anto a transformá di seremonia pa selebrashon pero ainda e kachu tei.