Den siglo 20 hopi hende a konsiderá strikamentu di kabei un nesesidat pa por konta den sosiedat. Bo estilo di kabei por a influensiá bo puesto den sosiedat. Mamanan tabata pasa oranan largu ta strika kabei di nan yu muhé. “Tempu mi tabata mucha, nan tabata usa esaki pa strika mi kabei. Mi tabata sinta den kushina banda di e stof. Bo ta sende e stof anto pone e heru riba dje. Tur biaha ku bo pone e heru riba stof, e ta keinta. Despues bo ta parti e kabei anto pasa e heru riba dje. Bo kabei ta bira las las. Ora bo kaba, no laga bo kabei muha paso e ta krin bék. Bo mester usa e heru di strika riba kabei limpi. Si bo kabeinan ta sushi, e ta bai hole malu. Tin hende ta bisa e ta hole manera kachu. Esaki ta e heru chikí, tin un grandi tambe. Nan tabata usa esaki antes, awendia ta usa stret pa kabei. Dia mi tata a haña sa ku mi a stret mi kabeinan ela rabia i bira tristu. Ela bisa ku mi a ninga su paternidat door ku mi a kambia e struktura di mi kabei. Despues di esei nunka mas mi a stret mi kabei.”