Un di nos partisipantenan a trese e rekuerdo di un evento grandi den su famia. “Mi tanta grandi a kumpli 100 aña. E tabata sinti algun krekeché pero su mente tabata skèrpi ainda. Nos a hinka hopi trabou den e selebrashon paso e tabata un dushi hende anto e promé den nos famia pa alkansá e edat spesial ei. Nos tabatin e rekuerdonan aki pa e huespetnan na e fiesta. E tabata un tremendo selebrashon!” Tin hopi sentenario na Kòrsou. E persona di mas bieu ku nos sa di dje riba Kòrsou a fayesé na edat di 110 aña.

Hende grandi tradishonalmente semper a hunga un ròl sentral den famia. Rèspèt pa e hende grandi ta un elemento importante di e kultura kurasoleño. Esei ta kisas mihó ilustrá pa e forma ku ta referí na nan den papiamentu. Kontrali na mayoria idioma, ansianonan no ta wordu yamá bieu pero grandi ku ta nifiká algu entre grandi i grandioso. Mas grandi, mas grandioso, meskos ku e tanta grandi aki.