Aceso na Latino America a bira importante pa e Hulandesnan den siglo 17 pa motibo di e abundancia na materia crudo y oportunidadnan di negoshi. Tawata negosha y importa materia crudo pa Europa, mientras otro productonan manera jenever gin tabata ser exporta for di Hulanda pa e region di Caribe. Aruba y Corsou tabata mei mei di e actividad economico aki como un centro strategico di transbordo pa e negoshi entre e continentenan. Jenever of ‘Bols’ ta un bebida alcoholico similar na gin. Apesar di su nivel alcoholico halto su supuesto calidadnan medicinal (pa circulacion di sanger) ta nifica cu historicamente e tabata ser prescribi pa uso medicinal. Tabata produci e bebida na Hulanda y e tabata bin den boternan di ceramica cu glas. Roy Feliciano, un colaborador / colecionista di museo, ta indica cu hopi di e diferente boternan di ceramica di gin cu a haña na Aruba tin e nomber Amsterdam of Bols scirbi riba nan.

“E tradicion familiar a continua y awendia mi ta bai cu mi nietonan pa buska artefacto”

Tur djadomingo Roy cu su suegro tabata kana rond Aruba buscando artefacto pa nan colecion (resultando den un colecion grandi di patrimonio cultural). Durante hopi di e salidanan aki nan ta haña boternan di gin, tin ora dera mitar den santo. E boter specifico aki a wordu haña banda di e minanan di fosfat di San Nicolas. E minanan a trese imigrantenan di e region cercano manera Venezuela, Colombia y Corsou na nos teranan. E mineronan tabata bebe e gin pa su supuesto beneficionan medicinal of djis pa placer despues di un dia duro di trabou. Nan a desaroya un smak p’e y ora nan a regresa cas nan a bai cu algun. Ainda Roy ta corda e boternan di ceramica cu tabatin na su cas di infancia, meskos cu cualke otro cas Arubiano tradicional. Awendia, e bunita boternan di ceramica aki a keda remplasa basta tempo caba pa e tiponan di glas.