E obheto aki ta un panchi plat tradicional “casuela” pa traha “pan bati” cu ta un acompañante tipico Arubiano. E casuela semper lo hala atencion di Atan Lee pasombra su famia a traha den e industria di cuminda pa varios generacion mescos cu e awendia.

“Mi ta corda su pan bati, nunca mas mi a purba un manera esun di dje.”

Pa Atan Lee, e casuela ta trese recuerdo di cas di su madushi. Cuminda ta un parti importante den e bida di e famia Arubiano y e ta conta cu come na cas di su madushi semper tabata un cos dushi. Su decendencia tabata humilde y tur cos den su kas tabata simpel. Mirando bek awor, e ta realisa cu e abilidad di sinta na su mesa rondona di famia y experencia su cushina tabata e luho maximo. E casuela ta relata na e isla como un parti importante di nos tradicion culinario. Ningun cas no tabata completo sin un casuela. Nos cultura culinario tabata influencia pa varios cultura durante diferente etapa di nos historia, for di e tempo di Spañonan, Hulandesnan y otro influencianan crioyo di islanan ruman den Caribe.