Maybeline Arends Croes tin hopi recuerdo bunita di su padu cu tawata toca den un di e prome gruponan musical folklorico di Aruba “Conhunto Folklorico Arubano”. Mo Tito, manera tur hende konose, a hasi e prome grabacion di musica dande, un tradishon di mas cu 150 aña na Aruba. Ta kere cu e nomber “dande” ta deriva di e palabra dandaré cu ta nifica bai di un luga pa otro. Despues di mei anochi aña nobo, gruponan musical ta bai di cas pa cas pa trese bendicion y toca cantica cu bon deseo pa famianan na Aruba.
“Como mucha jong mi tawata scucha su musica tur Djadumingo pues mi a crece…scuchando musica folklorico.”
Hendenan cu tawata biaha pa y for di Aruba, nan tawata trese musica cu nan pero nan tawata trese instrumento tambe. Pa e motibo aki, e tradishon musical di Aruba ta incorpora influencianan y instrumentonan di e regionan den bisindario pero tambe asina leu cu Europa. Hopi hende a bai for di e isla den e prome decadanan di siglo binti pa busca trabou na Cuba, Venezuela y Colombia. Ora nan a bin bek, nan a trece varios influencia musical. Hopi a imigra pa e isla den decadanan despues tambe pa traha na e refinerianan. E imigrantenan a trese musica vibrante y instrumentonan nobo. E hendenan di e isla tabata habri pa e ritmo nobonan aki. Musica a hunga un rol esencial den crea harmonia entre tur e diferente hendenan aki; esaki a facilita e Amistad y integracion cultural entre e imigrantenan y Arubianonan. E intercambio cultural vibrante aki ta bon preserva den Aruba su tradicionan musical manera Dande.