Radinka su lora, Amazona barbadensis, ta un para kolor bèrdè ku hel ku ta hopi bunita. Por enkontré na nort di Venezuela, na Isla Margarita, La Blanquilla i Boneiru. Semper Radinka a puntra pakiko Boneiriano tin un kultura di tene e para aki komo maskota. Ta interesante ku Radinka su investigashon a tres’e direktamente na e Indjannan Originario, ku a domestiká nan i a tene nan komo un fuente regenerativo di pluma.

Esaki ta mas interesante ainda, pasobra Radinka tin deséo di siña mas tokante su herensia di Indjan Originario. Ta resulta ku su relashon ku su para di famia, Kota Karina, ta un praktiká ku ta deramá hopi hundu den dje. Radinka ta dun’e kuminda, e ta karisia su kabes, e ta kanta ku ne, i na kambio, e ta duna Radinka plumanan bunita pa su arte. Durante su buskeda pa krea algu spesial ku e plumanan pa e eksposishon aki, Radinka a topa ku un dibuho famoso di un famia Indjan Venezolano yamá “Famiglia Indiana Caraiba”

Den e dibuho ei, e hòmber tin un tokadó di pluma riba su kabes i un para riba su man. Radinka a deskubrí tambe ku e tokadónan di pluma aki ta usá hopi biaha den Suramérika pa inishashon, ritual di funeral, pa shaman, pa bishita sosial, pa ekspresá identidad di grupo, pa marka diferentenan etapa di bida, òf komo símbolo di poder polítiko. Apenas ku Radinka a bolbe bai biba na su isla kerí,e ta sinti ku un tokadó di pluma ta e simbolo perfekto pa marka e etapa nobo di su bida. Na mesun tempu, e ta un manera pa selebrá su kultura Boneiriano i pa honra su bisawela, ku tabata di Puerto Cabello, na nort di Venezuela.