Ora ku Rivello wak bèk for di mucha bin ariba barete semper tabata un artefakto, un hèrmènt hopi importante den bida di su welonan, su tata, su rumannan mas grandi i te ku a yega na e mes tambe ku ta e yu mas chikitu. Semper nan a konsidera barete algu hopi importante. Nan ta konsidera barete komo un herment di multi-uso.

E prinsipio di barete ta pa koba buraku pa planta staka di kura ku eseinan, òf, pa planta mata, koba buraku Pero si bo wak barete por wòrdu husa pa bo brek hisa algu, bo por brek kibra algu ku mester kibra. Rivello a lanta konese su tionan traha ku barete, e la konose su tata ta traha kune i te ku awor e mes ta traha ku ne.

Komo mucha bo ta siña traha ku barete. Anto semper e orario ku nan sa husa pa koba staka, tabata parti mainta. Òf dor ku Rivello tabata bai skol, nan tábata koba staka hopi biaha atardi. Asina, su tio tabata asta koba staka anochi. E orario ku e tio tabata traha ku barete, tabata anochi. Ora ku ta mas fresku. Dus semper e barete tabata algu hopi importante den bida di Rivello i su kresementu. Paso kasi tur trabou ku un kunukero hasi, hopi biaha e tin e barete huntu ku ne. Anto huntu ku e barete, ta bin kompañá e Cocorobi ku ta e mitar kalbas pa yuda saka tera.

Esei tambe ta algu ku Rivello a lanta konose: e Cocorobi. Pero tin bes nan tabata husa bleki di tuna òf nan tabata husa bleki di berduranan pa yuda saka tera. Pa mas lihe. Ora ku Rivello wak e barete ku nan tin ta un barete ku e la lanta konose su tatanan ku ne. Anto e no ta kwalke barete, e ta un barete hopi pisa. Hopi hopi pisa.

Rivello su famia a hasi hopi trabou ku ne. Ketubai e tei, nèchi nèchi, duru, duru i ta sigi traha ketu bai. Segun Rivello: “ Esei ta lokual ku Mi por splika di nos barete!”