E malchi pa flèktu sombré aki ta un di e tikinan ku a sobra di loke un tempu tabata un fishi floresiente na Kòrsou; fléktu sombré. Pa hopi famia e flèktumentu tabata un fuente di entrada importante. For di na edat di seis aña muchanan tabata yuda flèktu. Na skol tabata duna lés den esaki tambe. Kòrsou tabata partikularmente eksitoso ku flèktumentu di sombrenan di Panamá. E sombrenan aki tabata wòrdu di flèktu ku e blachinan di e palma Jipijapa.

Un informe kolonial di 1913 ta indiká ku den e aña ei for di un poblashon total di 32.926 hende, 5.700 persona tabata ehersé e fishi di flèktu sombré. Na e punto kulminante, den e di dos mitar di siglo 19, un dozein sombré tabata generá 16 dòler na New York. Un montante grandi den e tempu aya. Kòrsou tabata eksportá mas o ménos 40.000 dozein di sombré pa aña. E kambio a bini na fin di siglo 19. Kompetensia ku China i Hapon no a benefisiá e flèktumentu di sombré na Kòrsou. Kasi no por a kompetí kontra e sombrénan di kabana ku tabata muchu mas barata.