Myrurgia Mutueel a trese e falis aki na un di nos workshopnan. “30 aña pasá mi a kumpra e falis aki na El Nilo de Egipto na Otrobanda, un pakus ku a sera hopi aña pasá. Mi amor pa opheto antik tabata hopi grandi e tempu ei. E tabata un forma pa mi rekordá mi niñes na kas di mi wela. El Nilo tabata bende hopi opheto modèl bieu. E doño tabata di desendensia libanes. Mi kièrsa e falis aki a bin di Medio Oriente.”

Na komienso di siglo 20 e sosiedat riba e isla a kambia di unu agrikultural pa unu industríal. Esei a trese kun’é ku imigrashon pa Kòrsou a krese. E promé libanesnan a yega den e temporada ei. E diáspora libanes histórikamente tabata dirigí riba komèrsio. Nan tur tabata komersiante ku tabata bende nan produktonan di kas pa kas anto sigun añanan tabata pasa, den nan pakusnan. Nan negoshinan tabata varia (te dia di awe) for di panaderia te restorant te muebleria. Algun di nan desendientenan a bira aktivo den polítika i servisio públiko.