Krat di bòter

Natasha Cabenda a haña e bòternan aki den mondi, e kapa será di palu ku flor ku ta kubri e seritunan di e isla. E mondi no ta solamente un desierto seku difísil pa penetrá. E ta tambe un kaha yen di tesoro di pasado.

“Sigun mi a bai mas profundo den historia, mi a kuminsá eksplorá den mondi. Durante ku mi tabata kolekshoná mi a topa e bòternan di limonada aki anto mi a realisá ku nan tambe lo bira antik. E bòternan pretu ta esnan mas difísil pa haña paso tabata paga 6 sèn deposito pa kada bòter ku hende tabata debolbé. Mi a haña esakinan den mondinan ku bo por a kana den dje antes pero ku a wòrdu sera pa públiko.”

“E krat mes tin un nifikashon speshal pa mi. Tempu mi tabata chikí, tur hende tabatin por lo ménos un krat di bòter bashí den nan kurá. Kada bes ku tabatin un fiesta nan tabata debolbé e krat na e tienda di bibida anto laga yena e bòternan atrobe. E tiendanan di bibida tabata bende limonada trahá na e fábrika lokal di Britannia manera Canada Dry i Orange Crush. Tempu mi a kolekshoná e bòternan aki e fábrika di Britannia a sera kaba pero bo por a bai yena bo bòternan di Pepsi i Pop na e fábrika lokal di Pepsi.”

“E krat i bóternan ta kordami riba selebrashon, fiesta i pasa bon. Ora di fiesta tabata pone un frishidèr bieu riba su lomba, yen’é ku awa frieu i blòki di eis anto laga tur e bòternan di limonada drief den dje. Nunka nos por a imaginá nos mes ku un dia lo a bende limonada den plèstik òf aluminio.”

“Mondi ta un kaha yen di tesoro di pasado.”